Ten Hag anukia AS Roma
Muktasari:
- Ten Hag alisimamia mechi ya mwisho ya Man United ikilala mabao 2-1 kutoka kwa West Ham na kuangukia nafasi ya 14 katika msimamo wa EPL na sasa ana nafasi kubwa ya kutua Roma inayotafuta kocha baada ya kuachana na Ivan Juric.
MANCHESTER, ENGLAND: KOCHA wa zamani wa Manchester United, Erik ten Hag ameripotiwa kuwa katika hatua nzuri kujiunga na AS Roma ikiwa ni wiki kadhaa tangu alipofungashiwa virago Oktoba, 28.
Ten Hag alisimamia mechi ya mwisho ya Man United ikilala mabao 2-1 kutoka kwa West Ham na kuangukia nafasi ya 14 katika msimamo wa EPL na sasa ana nafasi kubwa ya kutua Roma inayotafuta kocha baada ya kuachana na Ivan Juric.
Inaelezwa, Roma inayoshika nafasi ya 12 na pointi zao 13, iko nyuma kwa alama 13 dhidi ya vinara Napoli yenye alama 26, imekuwa katika mazungumzo na makocha kadhaa akiwemo nyota na kocha wa zamani wa Chelsea, Frank Lampard.
Hata hivyo, inaelezwa, Ten Hag anataka kuhakikishiwa mpango madhubuti wa kuachiwa timu kwa muda ili aijenge jambo ambalo ndilo linajadiliwa kwa sasa na wawakilishi wake pamoja na vigogo wa Roma.
Inaelezwa licha ya kuwa hana ajira, Ten Hag hataki kuingia kwenye matatizo kwa kuchagua timu itakayomfanya afukuzwe tena.
Kocha huyu raia wa Uholanzi nafasi yake katika kikosi cha Man United imechukuliwa na Ruben Amorim aliyetua Jijini Manchester, Jumatatu ya wiki hii kwa ajili ya kuanza kazi rasmi ingawa bado kibali chake cha kazi hakijatoka.
