Fei Toto anavyoweza kutumika Simba SC

FEISAL Salum maarufu kama Fei Toto ni miongoni mwa wachezaji bora wa kiungo katika soka hapa nchini.

Uwezo wake katika usambazaji wa mipira, kasi na weledi wa kusoma mchezo umemfanya awe kipenzi cha mashabiki wengi wa soka na kocha yeyote anayetafuta kuimarisha safu ya kiungo katika kikosi.

Akiwa bado ana mkataba na Azam FC hadi 2026, Feisal ambaye msimu huu amefunga bao moja na kutoa asisti nne, ameendelea kuhusishwa na tetesi za uhamisho wa kwenda Simba - timu ambayo ina lengo la kurejea kilele cha mafanikio ya soka la Tanzania na Afrika.

Katika makala haya tunakuchambulia nafasi ya Feisal kwenye kikosi cha Simba ikiwa vigogo wa timu hiyo ya Msimbazi watauma meno na kumsajili.

Pia mchango anaoweza kuuleta chini ya kocha Fadlu Davids na umuhimu wake katika kuisaidia Simba kufikia malengo kwenye mashindano mbalimbali.

Tunajadili uwezo binafsi, mfumo wa kiufundi ambao anaweza kuendana nao Simba, faida na changamoto zinazoweza kutokea iwapo uhamisho wake utatimia.

NAFASI YAKE

Feisal ambaye msimu uliopita alifunga mabao 19 katika ligi na kumaliza wa pili katika mbio za tuzo ya Kiatu cha Dhahabu iliyoenda kwa kiungo wa Yanga, Strphane Aziz Ki (aliyefunga mabao 21), ni mchezaji mwenye kipaji na ubora ambao umemfanya awe tegemeo katika safu ya kiungo ya Azam FC.

Alama za sifa zake zipo wazi kupitia uwezo wa kusoma mchezo, kutengeneza nafasi za mabao na kuunganisha timu kwa umakini mkubwa.

Huyu ni mchezaji mwenye uwezo wa juu kumiliki mpira, kutoa pasi za uhakika na pia kufunga mabao pale anapopata nafasi.

Sifa hizo zinamfanya awe kiungo mchanganyiko, anayejua kucheza nafasi tofauti katika safu ya kiungo na kuleta utofauti kwenye timu yoyote.

Feisal ni mchezaji mwenye utulivu anapokuwa na mpira, jambo linalomsaidia kufanya uamuzi sahihi hata chini ya presha kutoka kwa wapinzani. Hiyo ni sifa muhimu kwa Simba, timu inayohitaji kiungo anayejua kuongoza mchezo na kuifanya timu iwe na mipango madhubuti ya kushambulia au kutuliza mchezo inapohitajika.

Feisal anafaa kucheza kama kiungo wa kati au wa mbele anayesaidia washambuliaji, hasa kwa vile ana uwezo wa kutoa pasi za mwisho na kusaidia katika mashambulizi.

Katika mfumo wa Simba, nafasi hiyo itampa jukumu la kutawala sehemu ya kiungo, kutengeneza nafasi na pia kuchangia mabao. Kwa wachezaji waliopo sasa kwenye kikosi cha Simba, mchezaji ambaye anaonekana kufanya vizuri zaidi kwenye eneo la kiungo cha ushambuliaji ni Jean Charles  Ahoua aliyefunga mabao matano na kutoa asisti nne katika mechi 10.

MCHANGO WA FEISAL

Kwa muda mrefu Simba imekuwa ikitafuta kiungo mwenye ubunifu na uwezo wa kutengeneza nafasi nyingi za mabao.

Feisal ni kiungo mwenye uwezo wa kusoma mpango wa timu pinzani na kupanga mashambulizi kwa usahihi. Kwa uwezo wake wa kutoa pasi za moja kwa moja na zile za kushtukiza, anaweza kusaidia Simba kuboresha ubunifu katika kiungo, jambo ambalo litapunguza mzigo kwa washambuliaji na kuongeza tishio katika mashambulizi.

Chini ya Fadlu Davids, Simba imekuwa ikitegemea mfumo wa haraka wa kushambulia na mashambulizi ya kushtukiza (counter attack) - mfumo ambao unahitaji kiungo anayejua kuunganisha mashambulizi kwa ufasaha na kasi.

Feisal ana uwezo wa hali ya juu wa kupeleka mpira haraka kutoka safu ya ulinzi hadi ile ya ushambuliaji, akiwafanya washambuliaji kama Kibu Dennis na Leonel Ateba kuwa na nafasi nzuri ya kufunga mabao.

Kongeza ubunifu katika safu ya kiungo, Feisal anaweza kuwa chachu katika mpango wa Simba wa kushambulia na kuipa timu hiyo njia ya kupenya ngome za wapinzani. Mbali na ubunifu, Feisal ni mchezaji mwenye kasi ya asili ambayo inamruhusu kucheza vizuri katika mashambulizi ya haraka.

Uwezo wake wa kushika mpira na kuvutia wachezaji wa timu pinzani karibu naye humsaidia kuvunja mipango ya ulinzi ya wapinzani na kuwapa nafasi washambuliaji kujiweka sawa.

Kasi yake pia ni muhimu kwa kuimarisha ulinzi wa kiungo. Feisal ana uwezo wa kushuka na kupambana kupata mpira inapohitajika, na anaweza kuwa mchezaji muhimu katika kuzuia mipira ya wapinzani inayopita katikati ya uwanja.

Mchango wake hapa ni muhimu kuifanya Simba kuwa na mchezaji anayelinda eneo la kati kwa ufanisi, hasa dhidi ya timu zinazojaribu kufungua uwanja kupitia katikati.

Mbali na kutengeneza nafasi, Feisal ni kiungo anayeweza kufunga mabao. Uwezo wake wa kupiga mashuti ya mbali unamwezesha kuwa tishio kwa mabeki wa timu pinzani. Ikiwa atapata nafasi ya kucheza kama kiungo wa ushambuliaji au wa kati, Feisal anaweza kuchangia mabao moja kwa moja kwa kujaribu mashuti ya nje au kuingia ndani ya boksi mara kwa mara.

Kwa mfumo wa Fadlu Davids, Simba inaweza kumtumia Feisal kama silaha ya kufunga mabao ya mbali, jambo ambalo litapanua wigo wa Simba katika njia za kufunga. Pia, anaweza kusaidia washambuliaji kama Ateba kwa kutoa mipira ya mwisho kwa usahihi, jambo ambalo litazidi kuimarisha nafasi za Simba kufunga mabao mengi zaidi kwenye mechi za ligi na mashindano ya kimataifa. Kwa miaka kadhaa akiwa Yanga na sasa Azam, Feisal amekuwa na uzoefu mkubwa wa ligi ya Tanzania na aina ya wachezaji anaokutana nao. Anauelewa wa jinsi wapinzani wa Simb wanavyocheza, na mbinu za namna ya kuvuka changamoto hizo. Endapo atajiunga na Simba, Feisal atakuwa na mchango mkubwa wa kuwasaidia wachezaji wenzake kujiandaa vyema na kuwa na mbinu mbadala dhidi ya wapinzani.

Zaidi ya hayo, ushawishi wake kama mchezaji aliyefanikiwa katika ngazi ya klabu na timu ya taifa utakuwa na faida kwa wachezaji vijana na wachezaji wapya wa Simba. Atakuwa mfano mzuri wa kuigwa kutokana na nidhamu yake ya mchezo, kujituma, na umakini. Hii itachochea morali ya timu na kuwasaidia wachezaji kujiamini zaidi wanapokutana na changamoto kubwa kwenye mashindano.

CHANGAMOTO KWA FEI

Ingawa Feisal anaweza kuwa mchezaji muhimu Simba, uhamisho wake kutoka Azam FC hauwezi kuwa rahisi kutokana na mambo kadhaa:

1. Mkataba na Azam FC hadi 2026: Feisal bado ana mkataba mrefu na Azam, ambao unatarajiwa kumalizika mwaka 2026. Klabu ya Azam inaweza kuwa na sharti gumu kumwachia mchezaji wao muhimu, hasa kwa vile wanajua thamani yake. Simba itahitaji kutoa ofa kubwa ya kuvutia ili kumvuta Feisal kutoka Azam, na suala hili linaweza kuhitaji ushawishi wa kipekee ili kufanikiwa.

2. Kuingia Kwenye Mfumo wa Simba: Mara nyingi, wachezaji wanapohamia klabu kubwa kama Simba wanahitaji muda wa kuzoea mfumo mpya wa kiuchezaji, falsafa za kocha, na mazingira ya klabu. Feisal anaweza kuhitaji muda wa kuzoea mfumo wa Davids, hasa kwa kuwa Simba wana matarajio ya ushindi katika kila mchezo. Pia, itategemea jinsi Davids atakavyompa nafasi na kumjenga ndani ya kikosi.